Vava

Afastelpan fagnaði eins árs afmæli sínu hjá okkur í Vanabyggðinni 3. janúar og var að sjálfsögðu hrifin af kræsingunum, eins og fleiri, svo og gjöfunum og gestunum. Silja Marín var hjá okkur öll jólin og naut þess að vera miðdepill athyglinnar. Eins gott að ekki voru teknar hreyfimyndir af afanum, virðulegum menntaskólakennara, skríðandi um öll gólf, bablandi og bullandi út í eitt. En mikið var þetta gaman og það sem eitt lítið kríli getur veitt mikla gleði.

Silja æfði sig óspart í því ganga með borðum og ýtti líka öllu lauslegu á undan sér og er nú farin að mynda sig við að taka nokkur skref út í óvissuna. Afinn og íslenskukennarinn fylgist að sjálfsögðu spenntur með málþroskanum og bíður eftir fleiri skiljanlegum orðum. Hann taldi þó næsta víst að Silja væri farin að segja afi, þegar greinilegt vava hraut af vörum hennar. Kannski ætlaði hún bara að segja Vanabyggð en hikstaði á fyrsta atkvæðinu. Nei, vava skal vera afi. Það verður látið á það reyna næst þegar við hittumst.

Í dag er hins vegar 11. janúar. Það er góður dagur í mínum huga og hélt ég upp á hann með því að kaupa mér Pipp. En svo... svo fer maður að taka sig á og innbyrða gulrætur, greipaldin, engiferrætur og söl og skola þessu niður með blávatni. Eða... tja, það er nú próftíð í MA og þá er alltaf góðgæti á borðum fyrir yfirsetufólk þannig að hugsanlega frestar maður þessu aðeins og æ... síðan kemur þorrinn með öllu súrmetinu sem er eftirlætið mitt og fljótlega verður dóttir mín BA í íslensku og þá verður veisla og einhver afmæli verða og síðan koma páskar og... Já, það má víst endalaust fresta hlutunum.

 

Athugasemdir

[Valla (IP-tala skráð) 15.1.2010 kl. 18:25]

Innilega til hamingju með litlu dömuna :)

[Siggeir (IP-tala skráð) 27.1.2010 kl. 11:35]

Haha! Til hvers að gera eitthvað í dag sem þú getur gert á morgun? Sjálfur hef ég verið að ýta líkamsræktinni á undan mér eiginlega síðan í haust. Fyrst byrjaði skólinn og þá náttúrulega var enginn tími til að vera að rækta líkamann meðan maður skipulagði rækt hugsans. Svo var bara alltíeinu kominn próftíð og þá hefur auðvitað ekki nokkur maður tíma fyrir neitt nema lestur. Svo komu jól og þá á maður auðvitað að fara vel með sig og dekra við sjálfan sig. Nú á ég afmæli á föstudaginn, en er nú samt að spá í að kíkja í ræktina á eftir. Eða kannski byrja ég bara á mánudaginn?